Şeveke evînî

Ezîz Xemcivîn

“Ji bo bîranêna 12 adarê”
Buhar û kulîlk

Li bin dara giryok, 
dest li ber rû me diponijim… 
Dengê du-sê bilbilan 
ji hawîr tête min. 
Belam pênûsa min goyîn e;* 
dikale. dinale… 
Qamişlokê qolincên bîranînên te, 
li hinava min 
jîjo ne; gij in, 
û bê vehesîn in!* 

Li ser masa sincirî, 
li nêzî Lîsgeha birîndar, 
û li ber hêrsa kevirên raperînê; 
em û ewan kul û xeman tevde axifîn! 

Pênûsê şerma xwe avêt; 
da bin lingên kewên gulebarankirî…
Li ber nalîna girtiyan 
û li ber navtêdana 
xuşk û dêyan 
“mala xwe bernedin, 
mala we em in, 
mal namûs e; 
mal jin e, mal jîn e… 
malllllllllllll jîn eeeeeeee…
Talan be,
ferman be,
û bila têkçûna jiyanê be;
serhildan e… 

Em oldarên baxên sînga te ne,
dengê nimêja serhildanê 
ji “Dêrika Hemko” 
ta bi “Efrîn û Şamê”… 
dîlana manê û nemanê. 
Êdî 12ê adarê 
te newroz ji xewnên şêrîn şiyar kir.
 
Kulîlkên newrozê zû bişkuvîn. 
Zû bi zû rapirîn! 
Berfa çiyê zû vê carê heliya, 
lîlava sor ji dilan meşiya! 
Rehên stûr û canpola 
Ji comerdiya dilê ciwanên te 
çem û kanî derbûn..!! 
Dem hat dengê ker û lal 
nema bêdeng bimîne… 
Dem hat kuç û kevir 
êdî bi ziman bibin.. 
Evîn li bin cilan veşartî, 
çawa bimîne…? 
Sîng vebîn 
û pêsîrên şîrdana tekoşînê 
dibin kanî û diherikin..!! 
Deh û didiwê adarê 
birînên salan 
dilê min 
axxx
Deng ji Mehabadê gihande Hewlêrê 
“Kurdistan yek parçe ye, 
Qamişlo Helebçe ye”
Dayikên Amedê bi dengên herî bilind
li sînoran serî hildan. 
Serberz û bilind in 
xwîna herikî ronî li jiyana me dida… 
Serhildan e, 
gul di destên pakrewanan de 
27 gul li gerdena te bûn aleke ciwan… 
Va em piyala azadiyê bilind dikin 
bijî azadî hêêêê hê ..
Zarok rabûn 
li dibistana cegerdarî û lehengiyê kirin serhildan…
dema me bi rastî va ye hat 
sala 2004an tovê jîna tekoşînê
li deşthêviyên Osman Sebrî
gelê qehreman bi xwîna xwe ew çand…

Qamişlo
7/2004