Mizgîn Hesko
Ji bo şehîdên 12 ê adarê…û hemî şehîdên kurdan
Ji buharê ta buharê
Çend binefş bişkivîn…?
Çend nêrgis çilmisîn…?
Çend gelawêj çirisîn…?
Çend berbang fetisîn…?
Ji Helebça ta Qamişlo
Çend aheng
Çend festîvalê jiyanê
Têne li darxistin…?
Çend aheng
Çend festîvalê jiyanê
Têne li darxistin…?
Ji cejnên mirinê ta cejinên jînê
Çend Leyla
Çend Egîd
Çend Samî
Çend Ciwan
Çend Qasimlo
Ji dayik dibin…?
Çend pêxemberên nuh
Çend Zardeştên kal
Avistayê didomînin…?
Ji buharê ta buharê
Çend Barzanên nuh
Ji biskên rojê
Têne der…?
Çend Qadî
Di zikê Mihabadê de
Bûn çira û fener..?
Çend Şêx Se´îdên nuh
Ji mizgeftan
Vedan kesser…?
Çend Maşûqên nuh
Dijîn bi hêrs
Bo qada sor û zer…?
Ji adarê ta adarê
Çend Anahîta
Çend yezdanên dilbijok
Têne xapandin…?
Çend Şaxoşînên nuh
Tene perçiqandin…?
Ji serê salê ta binê salê
Çend bêrîkirin
Dikevin bin pêlavên biyaniyê de…?
Çend firmêsk
Di qermîçonkên riwên zuha de
Têne veşartin…?
Ji Nesrînê ta M. Şêxo
Çend Şeydayên nuh
Distirînin ji bo dilberê…?
Çend zeryên nuh
Dinerin ji pencerê…?
Ji Cigerxwîn ta Tîrêj
Çend helbestvanên nuh
Dest tavêjin kemberê…?
Ji îşqa Nîşanî ta evîna Feqhê gerhok
Çend Bêkesên nuh
Hildigirin pênûs û fenerê…?
Çend Agirdadên nuh
Vêdixin luksa berê…?
Ji Urgêş ta Qamişlo
Çend pakrewan j
Ji pêsîra goristanan
Ber bi asîmên ve hilperikîn…?
Çend Agirdadên nuh
Ji xunçên gulan herikîn…?
DÊ TU AGIRDAD BÎ
DÊ 12 ê ADARÊ JÎ CEJIN BÎ
DÊ 12 ê ADARÊ JÎ CEJIN BÎ
Ji buharê ta buharê
Dê tu Agirdad bî
Samana Newroza me bî
Dê tu Agirdad bî
Samana Newroza me bî
Dê tu arama çavên ku di bendemanê de
Melûl…melûl
Şilo..pilo dibin
Û dîse bi omîdên dîtinê
Avis dibin
Ji adarê ta adarê
Çendîn mahîtab rawestandin
Çendîn afîtab di binê ewran de nixumandin
Çendîn mahîtab rawestandin
Çendîn afîtab di binê ewran de nixumandin
Dê tu Agirdad bî
Dê tu ronî bikî xewnên me
Dê tu germ bikî dilkê dilê me
Dê tu Agirdad bî
Keftelefta mendalekî
Ku ji nuh îro ji dayik dibe
Dê tu hilm û bîna rîhaneke
Keftelefta mendalekî
Ku ji nuh îro ji dayik dibe
Dê tu hilm û bîna rîhaneke
Ku dinav kavilên wêran de
Hewil didî ku serî rake
Dê tu bejina findeke
Ku ji nuh ve tête vêxistin
Dê tu Agirdad bî
Di şopikên buhara me de
Tu ne bûyerî
Di hinavê dîroka me de tu SERHILDANÎ
Agirdad…kesê ku agir vêdixe, dadide, Kawayê hesinkar Agirdadê Newrozê bû.
