Mehfûzê mele silêman
Hêstir Wê herdem bi barin
Kezeb û dil wê bi arin
Ta ku em bi kar û barin
Heya hiş û bext şiyarin
Deng û dîmen tim zindîne
Pêt jî wek dûmanê dîne
Kurd jê re xizm û xwedîne
Çi bajarî.. çi gundîne
Were mîjoyê bixwîne
Were rewşa me bibîne
Jiyana me tim bi xwîne
Karê me şîn û girîne
Duşemb e, lê reş û sare
Sêzdeh e ji kewberdare
Ne sibeh e ..ne êvar e
Kul û derd e hem azar e
Amûdî dikin hawara
Agir girtiye dîwara
Law şewitîn bê hejmara
Ji hemî malbat û tara
Zarok dikin zîr û wîra
Dê jî didin qîj û qîra
Çare nake ava bîra
Ne şîretê jîr û pîra
Pirsyar bi gef û zorê
Şagirt hemî xistin dorê
Berê wan dan nava gorê
Bûn qurbanê bext û torê
Piştî firyad a pir bi coş
Amûdî bûne siyahpoş
Bo Cezayir a bê qidoş
Ya tim neyar û kurdfiroş
Mihemed xas ê deqorî
Bi camêrî bû cangorî
Giha asta herî jorî
Ew bûwe lavij û lorî
Dîrok e, lê pir xemgîn e
Her sal nûjan û birîn e
Rojek bi şîn û girîn e
Nîşan e, lê qehr û xwîn e
Tu carî naçin ji bîra
Pakrewanên wek xetîra
Didin çîk û tîşk û tîra
Rê vedikin li ber kwîra
Bê rapirsîn ma.. bobelat
Bê siza ma.. ew deshilat
Qerebo jî ma bê awat
Bûn qelenê doza welat
Ma ye peyker ê sînem ê
Bû we zingil ê her dem ê
Nîşan a bûyer û xem ê
Ya komkujiya sînem ê
—————————
Qamişlo – 15.11.2016
