Rêzdar Serokê Herêma Kurdistanê Mesûd Barzanî. Ji hemû kesî re zelal e ku serokayetiya Herêma Kurdistanê di dema salên derbasbûyî yên kirîza Sûriyê bi roleke erênî rabû, hem berdewam hewla avakirina lêvegereke neteweyî dida û hem jî hewla nêzîkirina aliyên siyasî dida û li ser asta navneteweyî pêwendiyên xwe yên dîplomatîk ligel welatên pêwendîdar bi rewşa Sûriyê ji bo doza Kurdî bi kar tanî û heta niha jî di vî warî de berdewam e.
Herweha Kurdên Rojavayê Kurdistanê ti carî biryara dîrokî ya cenabê serokê Herêma Kurdistanê Mesûd Barzanî ya derbasbûna Pêşmergeyên qehreman bo nav Kobanî ji bîr nakin ku, bi saya vê biryarê herêmeke berfireh ya Kurdî ji tunekirina yekcarî rizgar bû.
Ligel piştgiriya leşkerî û dîplomatîk, di dema derbasbûyî de serokayetiya Herêma Kurdistanê berdewam piştgiriya penaberên Rojavayê Kurdistan dikir, ji xeynî alîkariyên mirovî ku derbasî nav bajarên me bûn û barê li ser milê xelkê me sivik kir.
Rola herî pîroz ya cenabê serokê Herêma Kurdistanê, hewldanên wî yên berdewam ji bo nêzîkirina aliyên siyasî yên Kurd li ser maseyekê bû da ku Kurd di bin sêwaneke neteweyî di Sûriya siberojê de mafên xwe yên neteweyî werbigrin piştî ewqas sal ji zulm û zordariya li dijî Kurdan pêk hatibû.
Cenabê serokê Herêma Kurdistanê Mesûd Barzanî, berdewam em berê xwe didin we ji bo çareserkirina nakokiyên me yên siyasî, ji ber ku em hêviyeke mezin di kesayetiya we ya neteweyî de dibînin. Ji xwe nayê veşartin ku Encûmena Niştimanî ya Kurd li Sûriyê (ENKS) ji ber nakokiyan lawaz dibe û ev yek bandora xwe li ser doza Kurd çêdike, nemaze niha em li hember guhertinên bingehîn in li navçeyê û em bi pêwîst dibînin ku partiyên sereke yên ENKSê tenazûlê ji hev re bikin û berjewendiyên xwe yên hizbî deynin aliyekî.
Cenabê serokê Herêma Kurdistanê, em weke Hevdîtina Niştimanî ya Demokrat, giring dibînin ku hûn mûdaxeleyê bikin û hewla çareserkirina rewşa nav ENKSê bikin, ji ber ku îro ev encûmen bûye sêwan û navûnîşanek ji bo Kurdên Sûriyê û parastina hêzên sereke di nav de, bandorê li ser pêşxistina doza me çêdike.
Niha partiyeke sereke (Partiya Pêşverû ya Demokrat a Kurd li Sûriyê) ji ber nakokiyên ligel (Partiya Demokrat a Kurdistan –Sûriyê) ji Encûmena Niştimanî ya Kurd vekişiyaye, ji bo vegera vê partiyê û çareserkirina nakokiyan di vê qonaxa dîrokî de, em vê hêviyê di kesayetiya we ya rêzdar de dibînin, ku hûn weke her carê roleke erênî bibînin û piştgiriya we jî ji bo ENKSê nîşana dilsozî û hevxemiya we ye ji bo doza me di Sûriya siberojê de.
Herweha em daxwaz ji rewşenbîr, nivîskar, rojnamevan û kesayetiyên civakî li Rojavayê Kurdistanê dikin, ji her demê zêdetir piştgiriya Encûmena Niştimanî ya Kurd li Sûriyê bikin û hemû hêz dûrî berjewendiyên hizbî bikevin û berjewendiya neteweyî ya gelê me bidin pêş.
Rêz û hurmeta me qebûl bikin.
Hevdîtina Niştimanî ya Demokrat li Sûriya
18- 1- 2016
