Vekolînên Keça Kurd.. Di warê zimanî de

Herdu pirtûkên, di sala 2014ê de hatîne çapkirin, ya li ser ferhenga etimolojiya kurdî, li ba Nûbihar, li Istanbolê, di bin jimareya fermî (ISBN:978-605-5402-87-7) de, û ya dî, ku vekolîneke li ser naveroka pirtûka mamoste Cemal Nebez, ne diyar e li ba kijan çapxaneyê derketiye û bê jimareya fermî ye. Diyare nivîsevana me ya hêja û pilebala bi xwe ew li Almaniya daye çapkirinê. Ji xwe Keça Kurd, di malekê de jiya ye, ku pirtûk tê de ji her tiştekî dî giranbihatir in, ew xanima nivîsevan û lêkolînerê baş naskirî ye, Mele Mihemed Ehmed, ku di jiyana xwe de berhemêd xwe, bi keda xwe ya kesanî çapdikirin, û mixabin bi zûkî ji nav me bar kir (Xwedê dilovaniya lê bike).

Herdu pirtûk jî, gelek ciwan û balkêş hatîne çapkirin û derxistin, ya vekolînê, bi bergên xwe ve ji 100 rûpelan e, bi pîvaneya 21 x 15 ye, û bi tîpên nûjen e, ku mirov bi asanî dikare wê bixwîne. Pirtûka Ferhenga Etîmolojiyê hîn baştir û ciwantir hatiye çapkirin û derxistin, ji xwe Nûbihar bi va xebata xwe ya hêja ciyê rêzgirtinê ye û yek ji weşanxaneyên navdar e di warê berhemên kurdî de. Ev ferhenga delal û kubar ji 352 rûpelan e, û kurtenirxandineke hêja, ya ji aliyê Dr. Phil. Husên Hebeş ve, wekî paşgotinekê bergê wê paşîn dixemilîne, pêwîste lêkolînerê ziman û çanda kurdî wê bixwîne. Dr. Hebeş, ku helbestvanekî navdar e û şaxnasekî ziman û toreya kurdî ye, xwe pir ji zû de bi zanîna Etîmolojî û ferhengiyê ve gêro kiriye. Ew di paşgotinê de dibêje, ku xebat di vî warî de, li nav Kurdan qels û kêm e, û “rewşa me ya ferhengvanî û gelemperî jar e, tevî dewlemendiya zimanê me.”, lew re xebata Keça Kurd di vî zevî de nirxbilind e û pêwîst e ku zanîngehên kurdî piştvaniya wê di lêkirina berheman de bikin. Pêşgotina pirtûkê jî, ku ji sê rûpelan e, ji aliyê Dr. Hebeş ve hatiye lêkirin, ew dibêje ku wî sê carkî pirtûk xandiye, û wekî ez Dr. Hebeş, mîna dostekî kevin, baş nasdikim, ew guh nade her berhemekê, eger ne hêja û ne giranbiha be. Dr. Hebeş li ser mijarê di pêşgotina xwe de vê yekê jî dibêje: “Karê sêyemîn berhema Keça Kurd ya bi navê Ferhenga Etîmolojiya zimanê Kurdî ye, ku ji min xwest ez van çend rêzan binivîsim. Bi şahiyeke mezin min erê kir, ji ber ku ev lêgerîn ya yekemîn e di dîroka ferhengvaniya Kurdî-Kurmancî de, berhemeke weha ji aliyê ferhengvaneke Kurd ve tê belavkirin.” Ev dîtina pisporekî zimanzanîna kurdî ye, ji me re dibe belgeyeke zanyarî li ser va xebata giranbiha ya Keça Kurd.