Ronî Elî
Di peyala xwe de
Guhdarî gupgupa dilê yarekê dikim
Ne tenê lêvên min
Ji tirsa pêjna wê .. Dilerizin
Gewriya min jî
Bi her dengekî re
Hevokekê dadiqurtîne
Nizanim ka serxoş im
An kevanê hestên bi kul
Di argûnê şeydê de
Disoje … Û ji terazûyê dikeve
Di peyala xwe de
Dahola govendekê
Bi baskên şevê
Li ber serê dergûşekî bê deng
Lêdidim
Niçniçên xîfetan
Bi gera kadizê re
Radikim dîlan û lîlanê
Serxoş dikevin
Û hin jî
Perwanên li ser lêvên yarê
Xwe di agirê penaberiyê werdikin
Di peyala xwe de
Segên berbangê
Li rêwiyên sînoran
Şiyar û har dikm
Çemên miçiqî
Ji damarên bîranînan
Li ser koşkê demê diherikînim
Da di govdeyê xwe de
Giyanê miriyekî
Piştrast û nûjen bikim
Tenê ji bo li têla dil bibe siwar
Û di guhê şevê de biqîre
Hey lo lo welato .. De lê lê yarê
Di peyala min de
Morîkên gerdenê te
Mîna mûmên li ber ramûsanan
Di xwîna xwe de vedgevizin
Li min har dibin
Û bi noşa dawîn re
Bêxût û piştxûz dimînin
7-2-2017
Şîrove (0)