Ez û Te..

Ez û te ne.. Efrîn! 
Ne xewa min tê
Ne jî
Xumxuma ewran
Şevên te yên xulmaş radestî xewê dikin
Gelo! 
Çi tê bîra wan ewran
Ku helbestên xwe
Di guhên êvarên te de dixwînin? !!
Kê hûnandine

Ji bo te 
Ev şevên çavşil?!!
Ewr…
Stranên baranê distirên
Dem..
Hêdî… hêdî
Kefenê zivistanê didrû
Bîranînên min
Bi biskên baranê re dibarin
Hestên dîn
Dikevin kolana xeyalên min.
Bihna te
Ji nêrgizên buharê ye
Girnijîna nêrgizan 
Ji rengê te ye.
Erêêê… erê bajarê hêviyan!
Ez û te..
Di pencereyê re
Li keferatên zivistana sar 
Û jidayikbûna buhareke rengîn temaşe dikin.