Şorên Li Qor

Li qadan şerê hev dikin
Hevdû weke hejîran bi birînan tîş tîşî dikin
û di alavên ragihandinê de yên ku ew bi salan kuştine, qirkitine didin aliyekî
û tenê gef û xebergotinan bi gelê me re dikin!

—
Sibê ta bi êvarî li ser mediyayê ji kiryarên Îranê gazinan dikin
û daxwaza rûxandina rijêmê dikin
Li qadê jî li gorî pilanên wan dilivin!
—
Daxwaza sizakirina tawankarekî gendel, diz, gunehkar û kujer dikin
Paşê jî bi hemû hêza xwe li kêlek wa jînewerê ku ji avrêjkê genîtir radiwestin
Tenê ji ber ku kujer dijîtiya miletekî din dike!
—
Welatiyê ku di kêşe û kêliyên nakokiyê de gemarê di ser hemû paqijiyê re digre
Ji berê de lodê sergînê di hundirê wî de hildayî ye
Lê di rojên hêmin de ebeyeke xweşik bi ser xwe de berdide!
—
Heyanî ku bi hemen ava rijêman têne misdan, hêviyên pêşketin û geşepêdanê bi domandina wan re, hema hema bi qasî mîza pitikan e, ne tîna xakeke biçûk pê tête şikandin, ne jî golek bo semaya çend masiyan pê tête çêkirin.
—
Derewa biratiya rojên xweş û sayî ya ku tenê li ser vegotina şorên xemlandî û hevokên li qor ava bûye, di tengasî û xetmandina asîmanan de li ser rûyê zemînê çîblaq digere.
—
Bêhtirê dewletan bi darê zorê hatin ava kirin
Tên kurdê belengaz li bendê ye ku zagona zordariyê li cîhanê çanda dewletavabûnê bona xatirê wî biguhêre, û bi saya wî dewlet li ser bingeha mafê mirovahiyê bên damezrandin!