Mizgîn Hesko
Ji temenê kulîlkan
Hîn jî spêdeyek
Rê û rêwan
Hîn jî avrêl in…!
Çend bîstikên din
Û di xirecira bihara navîn de
Tiliyên keskesorê
Perwane vêdixînim…!
Dem û dewr
Hîn jî elind e
Pêkên…
Ku hogirî dilê siruştê bûne
Û tevî têlên rêsayî
Û pencên êşê
Bifirê dixînim…!
Û hêvî…
Deriyekî vekirî û bê dawî ye
Êdî vegera jê…
Xwekuştin e
Û ji destxistina heyvanê roniyê
Hem dilzarî
Û hem mirin e..!
Êdî vegera jê…
Xwekuştin e
Û ji destxistina heyvanê roniyê
Hem dilzarî
Û hem mirin e..!
Wiha û di vê riyê de
Ji temenê kulîlkan
Hîn jî spêdeyek…!
Baweşîna gulava omîdan
Yan jî…
Bênderek ji nîsanokên sava?!
Destên tîrêjê
Çivîk…
Ji hêlînên hevrîşimîn
Û ber bi kenaran ve
Bi çîvçîva xwe
Û kulîlkên ji şaxikên daran
Weriyayî !
Û liv û tevgera spêdeyê
Ron, bişirîn û silav e
Û ev tiliyên bi hingivê hunerê
Mest..
Ji şanên xwe der tên
Û li ser kirasê asûmên
Vedigerin pirpirîkên matmayî
Û piştî bîstikekê
Di xirecira werzê de
Û li ser pêsîra hêviyê
Pir hêmin
Û rewan aza
Diçin ava…!
29.Avrêla 2024
