Fewaz EBDÊ
Çawa agirê Newrozê li ser girê Niqare dibe neynika canê me
Çawa penaber bêriya germa nehwirandina stiranan dike
Çawa dil bêriya sirra bayê sibehê dike
Çawa can xwe bi navê Qamişlo ve dadleqîne
Çawa balinde di navbera Qamişlo û Nisêbînê de diçin û tên
û stiranên evînê awaz dikin
Bêriya te dikim
Her ku dilê azadiyê di bin kavilên bendewariyê de dijene
Her ku ba bêhna axa ku em lê meşiyan bi ser me de tîne
Her ku kaniya gund li ber dengê bilûra şivan semayê dike
Her ku kolanên bajêr bi vedenga navê te mest dibin
Her ku tîrêja rokê sinbilan radimîse
Bêriya te dikim
Bêriya dêmên te yên dişibin pelê gula avîgirtî dikim
Bêriya dengê te dikim, ku kelecana di hinavên min de aram dike.
Di her sirra bê de
Di baskê her balindekî dûr difire de
Di her çirisandina awirekê di nav kavilên wêran de
Di kenê ku Niqare bi Qamişlo ve girêdide
Bêriya te dikim
Bêriya te dikim
