Konê Reş
Malbata Xwedêjêrazî Kamîran Reşîd Berwarî!
Yekîtiya Nivîskarên Kurd li Duhokê!
Guhdarên Radyoya Dengê Duhokê!
Û wiha sal derbas bûn, wî dengê Duhoka Dasiniyan bi tev xisletên Duhokiyan ve, ji erdnîgarî, dîrokî, rewşenbîrî û şan û hunera pêşmergeyên qehreman ve bilind kir.. Û her wiha dostaniya me berdewam kir..
Kamîran Reşîd Berwarî; kurdperwerekî resen bû. Ji xwe welat li ser pişta kurdên resen têne ava kirin.. Çendî roja îro, pêdiviya me bi kesên wek wî heye..
Belê geşbînim bi wî bingehê ku kak Kamîran Berwarî di rêka radyoya Dengê Duhokê, li ser revabaza Barzaniyê zindî daniye. Roja îro, ew bingeh dipişkive, bi girsbûn mezin dibe û mîna dara Çinarê şax û paxên xwe bi rex her çar perçeyên Kurdistanê ve berdide..
Bêguman, koçkirina wî ne tenê xisarek mezine ji xelkên bajarê Duhokê re, belê xisarek mezine ji Kurmancîaxêfên Kurdistanê re. Çiko wî, rewşenbîrên her çar perçeyên Kurdistanê di bin sîbera Radyoya Dengê Duhokê de kom dikirin..
Belê roja îro bi saya tovê ku wî ji me re çandiye, wê hevalên wî, şagirtên wî karbin valabûnê dagirin û bi serketin rêbaza wî berdewam bikin..
Êdî nema zanim çi bibêjim?! Kes nikare li pêş qederê bisekine.. Dunya wilo hatiye û wê wilo jî derbas bibe.. Ga dimire çerim dimîne, mêr dimre nav dimîne.. Her wê navê Kamîran Reşîd Berwarî di dilê me de be.
Ji Yezdanê jorî hêvî dikim ku cihê wî buhişta rengîn be. Serê malbata wî sax be, serê rewşenbîriya Kurdî sax be û serê gelê Kurd sax be.
Konê Reş
Qamişlo, 22.06.2014
Şîrove (0)