Dilêrê Kurd û berhevoka ALAV

 Di dema dawîn de û nêzîk .. helbestvan û nivîskarê şanoyî (Dilêrê Kurd) , berhevoka xweyî helbestî çap kir .. bi navê (ALAV) , û ev dibe ya çaran ji berhemên wî yên çap kirî , û wek tê nasîn helbestvanê me helbesta kevneşop dinivîse , lê vê carê azadî da pênûsa xwe û ser bi xwe kir , û pênûsa wî jî xwe kêm ne kir û helbesta nûjen hilbijart .. û kir piroje ji vê pirtûkê re , û ji ber şanoyê jî dinivîse .. em dibînin di helbestên wî de , wek li ser depê şanoyê be û bi rola xwe dilîze , çindikan û çerefîtan dide ..

û bi çiv û bi riv û xwe şêrîn dike mîna gezo û hungiv , geh bi xwe re di axive û carnan bi hawîr xwe re jî di peyive û dilive , bêtir sîber û xewnên nedîtî dibîne , diçe gundê xwe û li dayik û bavê xwe dihêwire .. û di himbêza wan de xilmaş dibe , zarotiya xwe tîne bîra xwe û leyîstikên biçûkanî .. û omîda wî ye vegere li şevbihêrkên malbatî , li heval û hogir û dostên xwe .. û li gerdişên berê , li şivan û pezê col û gok û hol , li dewkil û dotina pez û bêrîvan , û keç û xortên evîndar û li buharê di nav kulîlkan de didin hev civan , pîr jî li ser tevnan hepo di dest wan de û bi tevnan mijûlin , teşî rês jî teşiyên xwe dirêsin .. û dayik zarokên xwe şîr didin di dergûşê de dilorînin , pale û karker û  cotkar derdikevin û berê wan li kar , û di nuhurînin û sitiranên nemir Mihemed Şêxo dibêjin û li hev vedigerînin , dil mest û xemgîn dikin û dil têşînin , û di dawîn de helbestvanê me dixwaze dûmahiyekê bide şanogeriya xwe, wek yekî xatir bixwaze û temîniyên xwe dike û dibêje ..          
Ger ez bimrim . 
Min veşêrin li gundê min . 
Raser xanî û mala min .
 Nêzîk bav û dayik û bira û xwîşka min .
 Li bin siha dara jiyana gelê min .
 Heger bû pirsiyan li min .
 Bêjin .
Dilêr bû .
 Têkoşer bû .
 Kelem bû di çavê dijmin .
Wê çaxê nû wê gundiyêd min şiyar bin .
 Nû guhdar bin li dengê min .
 Bi pêdarî .
Wê bêjin gotar û şano û ristêd min .
 Bidin ser şop û rêça min .
 Zê jî gorî û xelat bim .
 Bo Kurd û Kurdistana min .
Û dibêjim ev pirtûk çilo be .. herî gavek fireh û rast û duriste , û Dilêrê Kurd ji kesên giran buha ye, û xwedî behremendiyek mezine .. di helbesta Kurdî de û di şanoyê de jî , dest sax be hozanvano .. û supas ji te re şanovano , û serkeftin bo te û pêşve her û bê veger …
 Rojnamevana Kurd .. Hemrîn Ehmed
 Qamişlo