Çapa duyem a “Ferhenga Sobaro” hat belavkirin

Welatê Me – Taybet

Zimanzan û nivîskarê Kurd Muhemed Ehmed Reşîd ragihand ku çapa duyem a berhema xwe ya ferhengî bi navê “Ferhenga Sobaro” derketiye ronahiyê. Ev ferheng, ku bi şêwazek taybet li gorî rêzbendî (serwayî/qafiyê) hatiye amadekirin, ji bo zimanzan, lêkolîner, helbestvan û hemû kesên ku bi zimanê Kurdî re mijûl in, çavkaniyek girîng e.

Li gorî daxuyaniya danerê Ferhengê, amadekirina vê berhemê zêdetirî 16 salan xebat û lêkolîn xwestiye. Wî di vê demê de hewl da ku gelek peyv, wate û devokên zimanê Kurdî ji çavkaniyên cuda berhev bike û di ferhengekê de bicivîne.

“Ferhenga Sobaro” zêdetirî 36 hezar peyv û wateyan di xwe de digire û ji 387 rêzbendan pêk tê. Ferheng bi taybetî dewlemend e bi peyvên Kurmancî, devoka Botanî, her wiha bi gelek peyvên Soranî û hin peyvên kevnar û dîrokî.

Taybetmendiya sereke ya vê Ferhengê ew e ku peyv ne li gorî alfabeyê, lê li gorî serwayî û herdu tîpên dawî yên peyvan hatine rêzkirin. Ji ber vê yekê ev ferheng ji bo helbestvan û kesên ku di warê edebiyat û zimanê Kurdî de dixebitin, alîkariyek girîng pêşkêş dike.

Daner diyar kir ku çavkaniyên ferhengê tenê ferhengên Kurdî nînin, lê folklora Kurdî jî tê de cih digire; wek stranên gelêrî, çîrokên devkî, dastan, efsane û berhemên helbestvanên navdar ên Kurd.

Muhemed Ehmed Reşîd di pêşgotina berhema xwe de bal kişand ser girîngiya parastina zimanê Kurdî û got ku ziman bingeha nasnameya neteweyî ye. Wî got ku armanca wî ji vê xebatê xizmeta ziman, çand û mîrata Kurdî ye.

Di dawiyê de, daner daxwaz kir ku ev ferheng bigihîje destê hemû kesên ku dixwazin ji wê sûd werbigirin. Wî got ku “Ferhenga Sobaro” xebateke vekirî ye ji bo hemû xwendevan, lêkolîner, mamoste û kesên ku bi zimanê Kurdî re mijûl in.

ji bo daxistina Ferhengê li ser lînka jêr bi tikîne: