Fewaz Ebdê
Di wêneyekî bi rengê bîranînekê de
Bi tayê simbêlên sivik
û awirin li kêlekê dûûûr dinerin
Serê xwe ji nav gelemşa serdemê derxist
û lêbûrîn nexwest
Mîna ku ez li nefsa xwe dinerim
çawa ji zanîngehê derdikeve
çentak bi xwe re hilgirtye
tijî axa Niqare ye
bi ava gola Kendal stirayî
bi pelên genimê nihêla Sêremka pêçayî
û tîpên minî pêşî lê hatibin nivîsandin.
*******
Li Şamê xwendekarek bûm,
lê min Qamişlo dixwend
Vaye hîna min çêja Niqare
di bêrîka gumlekê xwe de veşartiye
û bi darpemboyekî min ji balgeha pîrka xwe dizî bû
min navê xwe li ser kevir û kuçên wê dinivîsand
li ser lêmişta ber çemê wê
wa hîna ava çem ew jibîr nekiriye.
Navê xwe
min li ser liboka dahfkê nivîsand
û li ber Qitika veda
Qitikên ku bîrdank vepixartin
û anîn bîra min ku
em jî koçber dibin
penaber dibin
û vedigerin
vedigerin, lê ne bi laş em vedigerin
em bi navê li ser kevir kolayî vedigerin
bi çêja hê di bin ziman de
em vedigerin.
Belê, rast e ez Fewaz im
lê ez kevirek im jî li Niqare
Sîberek im
di wêneyekî kevn de.
Û di dawî de
Gava ximav ziwa dibe
Bi zimanê xwe
li ser Tûzik û Sersipîkê dinivîsim
bi nermî
dest davêjim “Nikilê Dîk”
mîna ku dest bavêjim nikilê zaroktiya xwe
Niklê zaroktiya ku
kenê wê ji peravên çem qut nedibû
20.10.2025
Dortmund
