Di kêlîkên dijwar ên şkandin û rûxandina dîwarên tirsê de, di kêlîkên ku dîroka bindestan li Qamişloyê bi xwîneke pîroz dihate nivîsandin de û piştî serdemên binpêkirin û çewisandinê, piştî hewldanên ji holêrakirina nasname û taybetmendiya mirovê Kurd, kurdên 12ê Avdara 2004ê serî li hemberî zor û stema dagîrker û nijadperetan hildidan, di wê serîhildanê de, wateyên hebûnê dihatin guhertin û giyanê kurd bi sirûdên azadiyê dihate rapêçan. Di heman kêlîkan de, li derveyî welêt, dengvedan û rengvedana serîhildana Qamişloyê bi gelek awayan û bi şêwazên cihêreng ên çalakiyan rûdidan. Damezirandina Hevgirtina Rewşenbîran jî, di Nîsana 2004ê de, serencama berxwedan û xwîna mezin a şehîdên Qamişloyê bû. Li bajarê Sandvikena Swêdê, bi alîkariya welatparêzên kurd, bi mebesta avakirina saziyeke rewşenbîrî, komek rewşenbîr civiyan û biryara çalakkirina rola rewşenbîran û geşkirina cîhana çand û ziman û huner û ragihandina kurdên Rojava, dan.
Hevgirtina Rewşenbîran, hetanî kongireya xwe ya sêyemîn jî, bi awayekî çalak tevdigeriya, birêvebirina malpera rojava.net, Kovara Urkêş, li gelek welatên ewrupayê li darxistina simîner û çalakiyan; hin ji xebatên wê bûn. Lê serê çend salan in, li pêşberî astengên aborî, civakî, îdarî û takekesî jî, Hevgirtin naçar mabû ku bêdeng bibe û xebata xwe ya di çarçeweya karên hevbeş ên rewşenbîrane de rawestîne.
Em, hin damezrêner, hin endamên komîteyan, xwe wek berpirsên rawestana Hevgirtinê dibînin û em ji nû ve hewl didin ku, Hevgirtinê, bi lidarxistina kongireya wê ya çaremîn (25-26. 01. 2014) çalak û ektîv bikin da ku erkên xwe yên dîrokî, di van qonxên hestyar û çarenûsane de, pêk bîne.
Banga me ji bo hemî rewşenbîran ku, bi çalakî beşdarî kongireya çaremîn bibin, piştgiriya kongireyê bikin, destên xwe têxin destên me de, da em bi hev re, kongireyeke serkeftî biafirînin.
Her wisa banga me bo hemî hêz û sazî û rêxistinan jî ku piştgiriya kar û barê kongireya me bikin û di hemî waran de alîkariya me bikin.
Bi mebesta ku Kongireya Çaremîn xwedî li vê qonaxa dîrokî derkeve, bi mebesta em dest bi karekî bikin; karekî ku hêjayî xwîna mezin a welatê me be, ku hêjayî giyanê şehîdên şoreşa Rojavayê Kurdistanê be, em rewşenbîrên kurdên Rojava (nivîskar, helbestvan, şêwekar, rojnameger, şanoger û sînemager) bi dilgermî vedixwînin Kongireya Çaremîn a Hevgirtina Rewşenbîrên Rojavayê Kurdistanê..
Komîteya amadekar a kongireya 4ê ya Hevgirtina Rewşenbîrên Rojavayê Kurdistanê (H.R.R.K)
24. 12. 2013
TÊBÎNÎ: Ev vexwendin ji boyî endamên Hevgirtinê û ji boyî hemî rewşenbîrên li derveyî Hevgirtinê ye.
ji boyî rê, cih û mayînê, tika ye li ser e-peyama jêrîn me agahdar bike:
ji boyî rê, cih û mayînê, tika ye li ser e-peyama jêrîn me agahdar bike:
