Ger tu Nikarî

Majêd a Mihemed

Bo malbata her çar pakrewanên bajarokê Cindirêsê û devera dîl

We gelekî spas dikin
ku hestên we
Li nik tirajîdiya wan
Bi xemxwarî xwe dirêj dikin
We pir spas dikin
ku hûn rewşa wan a rojane

Li ser alavên ragihandinê

Bi kuzûr belav dikin
We zef spas dikin
Ku hûn ji çend rojan de
Li şûna eynikan
Di ronahiya dîmê wan de
Bi hezkirin xwe temaşe dikin
Lê eger hûn bi giştî
An tu wek nûnerê ku li şûna wan rûniştî
Bi çi awayî nikarî
Êş û azarên wan ji berê siviktir bikî
Ger tu nikarî
Fişarên mezin ji ser jiyana wan kêm bikî
Ger tu nikarî
Barê giran ji ser pişta wan rakî
Ger tu nikarî
Stiryekî ji mitên di govdeyê wan de hilkî
Ger tu nikarî
Çeperekê ji tevaya navbirên jiyana wan tarûmar bikî
Ger tu nikarî
Zîndanekê ji nav tevaya girtîgehên wir ji holê rakî
Ger tu nikarî
Wan an wî ji nav lepên stemkarê qirêj serbest bikî
Ger tu nikarî
Guhartinê hema piçekê di ketwarê wan de çê bikî
Ger tu nikarî
Zordaran li seranserê gerdûnê riswa bikî
Ger tu nikarî
Dewletan di rûyê dagîrker de har bikî
Ger tu nikarî
Mûçeya heyvekê pêşkêşî endamên tevgereke azad bikî
Ger tu nikarî
Wî an wan rizgar bikî
Dirûşmên giran velû guhên wan neke
Nîgaşên serfiraziyê bi ser wan wer neke
Bi sirûdên rizgariyê wan xilmaş neke
û hêviyên xapînok di hişê wan de mezin neke.
27/3/2023