Em li benda we ne !

Helbest : F. F. Fîsotiskî
Werger : Besam Mistefa

Serpêhatî wisa bû :
Mêr bi lez bi rê ketin ,
Berî dexl şîn werin ew çûn ..
Nema êdî ji pencereyan ve
Dihatin xuya kirin ..
Tevlû toza rê bûn û ..çûn
Eve ji sumbilan

Ceh û genim bilind dibin :
     Ew rondikên deştên ku hîn nehatine
     Çinînê ne ..
Eve di qelşan de ba dike
Vîze vîz ..
     Em li benda we ne …
     Hespan li kar kin ..
     Li benda we ne
     Di kêlîka xweşiyê de
     Em li benda we ne
     Ey lehengino !
…..Xwedayo tu bihêlî ku ba asa û
Teze be
Daku laşên wan yên xwêdangirtî , sar û hûnik
Bike …
     Em li benda we ne !
     De hûn zû..zû vegerin ..
     Berû ser we digirîn ..
     Darên tû û hejîran hişk û hola bûn
     Tevde pûç bûn bêyî kenên we ..
     De werin ..
     De zû vegerin ..

Piştî hûn çûn
Xanî li me bûne zindanên sarî tarî..
Bêyî we , malên me tenê kevir in ,
Kevirên ku tukes di nav wan de
Najî !
Piştî hûn çûn
Tenêbûn û bendewariyê di nav malan de
Kon vedan !
Piştî hûn çûn
Kincên me ên sipî û paqij
Reş û qirêj û gemarî bûn …
Taku stranên me yên kevnare
Nexweş bûn û bê wate dibûn tanî
Ku gotinên wan bi diranan ve
Digirtin ..
     Li vir êş ew êş e ..
     Birîn ..ew birîn e..
     Her roj ew şîna bê dawî
     Li ba dibe ..
     Her roj ew girî , wekû dengê nimêjin kevin ,
     Bilind dibe ..
     Em li benda we ne ..
     De zûka vegerin
     Emê tev ,
     Peya û siwar
     Dilbiêş û xembar
     Werin pêşiya we û
     We hembêz bikin .
     Ne xem e hûn çawa bin..
                             Çilo bin ,
     Emê we hembêz bikin ..
     Ji bo Xwedê dilê xwe li me
     Teng nekin ..
     Em , ewên ku pir diêşin ji
     Valahiya nameyên şîn û mirinê..
      Ên ku pir diêşin ji bendewariya wan
     Nameyan ..
     Em li benda we ne ..
     Hespan li kar kin ..
     Li benda we ne
     Di kêlîka xweşiyê de
     Xwedayo tu bihêle ku ba asa û teze be
     Daku laşên wan yê xwêdangirtî sar û hûnik
     Bike …
     Ji bo Xwedê hûn zû ..zû
     Vegerin ..
     Di malan de li ser we digirîn ..
     Darên tû û hejîran hişk û hola bûn
     Bêyî we ..
     Bêyî ken û henekên we ..
     De werin
     Em li benda we ne
     Zû werin ha !

شارك المقال :