Dildar Aştî
Deşta șîna min
Berferhe bê pîvan e
Çiyayên xemên min
Di asoyên keserê de
Serê xwe reş girêdane…
Dilê min
Çalake bê westan e
Ji bo wisa evqase derd
Ji ser dilên xelkên doran
Civandine
Di kendavên birînê de
Bi bêhrî hêwirandine!…
Şevekê
Li pala derîyekî ker
Min maçek wêne dikir
Sibeha din
Bûm tewanbarê evînê!…
Êvarekê
Li ber kaniyeke perwer
Min gulek şermîn bêhn dikir
Sibeha din
Bûm nîşana tîrên kînê!…
Li gunehê min bipirsin
Ez dizanim min çendî xem
Ji nav baxên cîranan firandine
Çendî destên alîkar
Bo neçaran vemaltine…
Wê kî bêt û mikur bêt
Meydana me
Pêşbirka sextebazan e
Yarîgeha kedxwar û keysebazan e!…
De destên xwe ji êşa min bikişînin
Bihêlin
Ez û vî dilê lewend
Di rivîna pîroz de
Xwe vehesînin! …
3/7/2026.
***************
