Şîlan Doskî
Dema awirên te,
hest tepeserkirin,
rondik berî li ser milê şevê bibarin,
di çavên min da kirin tilov!
Tîrek ji kevanê peyman Lozanê,
wijdana min nîşan dike…
Bêhna nakokiyê, ji axa min tê!!!!
Ev êşa kevn,
dil diêşîne Kulîlkên rêsilîn,
bi kîmya siyaseta xwe, rêsirandin….
Rengek ji rûyê vê deştê, ketiye…
Duh ev xak baxçeyek tije ronahî bû,
evro, wêran, bêdeng û bi jan e….
Dûrî yekparçebûna axa Kurdan e…
Ev jana bi girî, dengê bêdengiya dil e….
Her dilopek, çîrokek nîvco ye..
Carinan, mîna baranê, nerm û sivik
carinan, mîna bahozekê,
şikestî li ser kela dil, dibare…
Carinan, li mişextiyê, janeka penaber e..
Carinan di himêza evînê de,
bêkes e,
bê bask e,
Gazina min, êşa ku ne hatiye hestkirin e…
Evro û her spêde bi ronahiya çavên te
rêya xwenên xwe dibînim
Rojavayê Kurdistana min….
15.03.2025
Şîlan Doskî
……………………………………………………..
Tilov: Dindikên berfê yên pan û bi hev re
Rêsilîn: Nazdarbûn
Rêsirandin: Lawazkirin.
Şîrove (0)