Ferhadê Haco
Hevalo! Ma ne bese îdî ev bez
Daw di devde bi hewarî di pey te de ?
Ta kengê ez ê li benda te bim
Van qîrînên nedeykirî bê deng bikim
di kezeba xwe de
Ta kengê ezê bimînim
bi rebenî benda azadî
û serkeftinên te
Ta kengê!
Ta kengê heval!
Ez mandû bûme, heval:::
Ez nema karim hilperikim
bi van lat û keviran ve
bi xwedê ez êdî mandû bûme …
Ez nema karim li zinaran berfê bixum
û nema karim li şikeftan binivim
û li ser kêstekan ez pal bidim
Ma ne bese îdî, heval?
Bi salan e,
bê ûmîdî ev ber û fîşek dikin xurîn
û tum û tum ev gurme gurm e
Bi salan e ku tu gurzê xwe dihejînî
bi mebesta
stêrikan ji asîmanan daxurînî
wan ji min re bikî ristik û bihûnînî
Lê ji min re îdî xuyaye
ne bi gurm gurmê ye, heval
û ne bi daneheva
paçik û stêrikên renge renge
pîne dikî bi alên xwe ve
Ma ne bese îdî, heval?
Li pêş wênyên serok
Serxweş û bê hiş bi cizbê dikevî
û berfûtkên te yên berxwedanê
Bese îdî vê hewldanê
bi hişkeber te girtîye çerxa jiyanê
tu dixwazî wê Çartew bikî
û li gora xwe bitewînî
Lê tu jî dizanî
ku bi ters û nezanî wê çerxê nagorînî
Hevalo xeman nexwe!
Ez kurd dimînim
Li ber dergihê Kurdistanê
nehtorvan im
Xemgêrîya min
ne xwarina nanê ziwa ye
ne bahoz e û ne serma ye
Ne xeme ji min re
jiyana li serê çiyan
û hilprikandin bi lata ve
Ne xeme ji min re
dijî dijminên taristan
bi şev û rojê ez şer bikim
Lê xem ew e, heval
ez keç im,agir im, pizotim
ne bi tenê ez şervanim
Ez nikarim di dilekî genc û ciwan de
vî agirî vemirînim
ez ê çawan bikaribim
Memê Alan himbêz bikim,
deydîk bikim û bilorînim
bikaribim xwe bixapînim
li ser Siyamndê silîvî
hêstirên dilkoj nebarînim
Li vî çiyayê sar û bê dilşewat
ez ê çawan bikaribim, heval
Ji te re bêjim û te liber bixim:
Ez keçim, ne bi tenê ez hevalim
Bihar û Newroz min şîn dikin
di govenda de dest li xortên evîndar
dipalînim
jibo wan himbêz bikim
sing û beran jê wan re pêşkêş bikim
Heval
dijminên te xewnên min in!
Ma tu nizanî ez dixwazim
van xewnên xwe bi cî bikim
ji bin lingên serok û rêberên te
birevînim û rizgar bikim
Heval
ji bonî te ez îdî serê xewnan natewînim
di nav belbelîskên siloganan de
napêçim,
kefen nakim
û wan li gorîstanên
xewnên şoreşên têkçûyî naveşêrim
Ferhadê Haco
Swêd adara 2012
