Azadî , wekhevî û rûmeta mirovî berî her tiştekî din

Dr. Kamiran Haj Abdo
 
Berî 22 heyvan xelkê Sûriyê serûber, bi kurd, ereb û aşûriyên xwe, bi misliman, xirîstiyan û êzdiyên xwe, bi sune û elewiyên xwe, bi jin û mêrên xwe, dest bi şoreşeke pîroz kir. Armanca zelal bû: rûxandina rêjîma totalîter û bidestxistina azadî, wekhevî û rûmeta mirovî. 

Şoreşa ku ya tevaya xelkê Sûriyê bû li dijî beşekî ji xelkê Sûriyê şer kir… Şoreşa ku ne ol û ne mezheb nas dikirin bû şoreşa yek olê û yek mezhebê… Şoreşa ku dusrûşma xwe “gelê Sûriyê yek e” îro şerê pêkhateyeke bingehîn ya xelkê Sûriyê dike – şerê netewa kurd dike. Hem hinek siyastvan, yên ku li pişta şoreşê nîştine, hem jî hinek çeteyên çekdar, yên ku xizmeta ajendeyên şovenîsta ereb û ya turk dikin, îro şerê netewa kurd dikin. Ma Serê Kaniyê hindik e?!

Bila ew hemû zani bin ku gelê kurd pir ji wan xortir e. Gelek kesên mîna wan hatine û çûne, lê em li vir in, em li azadiya xwe dipên. Emê wê bidest bixin jî.
Bila ew baş zani bin ku bê rêzgirtina li maf û azadiyên bingehîn, bê pêgiriya li mafên hemû pêkhateyên Sûriyê ev şoreş bi ser nakeve. Çunkî rêjîma el-Esed jî bi hemû hêza xwe bi ser ne kat…

Werin, hîngê dem ne çûye, em şoreşa xwe, şoreşqa azadî, wekhevî û rûmeta mirovî biparêzin û bi xebata xwe ya hevbeş wê bi ser xînin.
Werin em dev ji ajendeyên xelkê berdin û em tenê hêvî û berjewendiya Sûriyê, weke mirov û welat, di ser hertiştekî din re bigrin.
Werin em bi hev re Sûriyeke nû ava bikin, ya ku mafê hemû mirovan bê tu cudahî biparêze û pêkhateyên olî û netewî yên Sûriyê hemûyan wekhev û azad bike.
Werin em bi hev re welatekî ava bikin, yê ku taybetmendiyên me hemûyan biparêze û pêşve bibe…
Werin em pêkve ala azadî, demokrasî û wekheviyê bilind bikin…