Ji bo Bavê Ciwan di bîranîna salvegera wî de

 
Diya Ciwan

                                    Min digot qey tu carî, dara Mazî hişk nabe….

û kevirên gundê me pîr nabin….
Min digot qey tu carî, Stêrik ranazên……
û birînên min careke dî şiyar nabin..
Min digot qey tu carî,
pênûsa min lal nabe…
De were loooo…de were lo…

Çavên min û van helbestan.. ji riya vegera te..
westihan û qerimîn..
De were looo..
de were lo..binêre;
ka çawa ez bi rondikên xwe destnimêj digrim !!
Kî dibêje derdê te bê dermane..
û çûna te bê vegere..!!??
Hey lê lêêê…hey lê lê….
Hey lo loooo..hey lo lo….
De were loooo..
Dê tu henekê xwe li kê bikî..?
Bi Xwedê…Her heft bira û her pênc xwehik
û her şeş zarok..
Her çar dîwar…..
Cîran û kolan..
Balgeh û doşeka te…
Berçavk û se’eta te
hemî weke min dibêjin :
De were looooo
de bese looo
De were lo….berya ku agirê mirina xopan
xewnên min hemiyan
bi hev re bişewitînin …
Ma tu carî
pismaman xwe ji ber sozên Dotmaman dane alîkî..!!!??
De were lo…
Bi Xwedê, ditirsim ku bimrim
eger rojekê ez hest bikim ku
vaye
tu
  MIRÎ.